RCLM Baucau (20/10/2026)—Implementasaun aktividade Programa Nasionál Dezenvolvimentu Suku(PNDS) regular tinan 2026, iha suku Bado-Ho’o Postu Administrativu Venilale Munisípiu Baucau ne’ebé prioriza konstrusaun irigasaun eskala kiik besik konklui tanba progresu fiziku atinji 86%.
Lideransa Komunitariu ne’e relata, aktividade PNDS regular tinan ne’e implementa iha aldeia Caiuatula hodi konstrui irigasaun eskala ki’ik metru 168 no sei fornese bee ba natar ektares 20 resin.
“Aktividade PNDS tinan ne’e suku Bado-Ho’o halo irigasaun iha aldeia Caiatula serbisu agora la’o hela no hau hanoin to’o 29 fulan ida-ne’e (Outubru) tenke hotu.” hateten Xefe suku Bado-Ho’o ba RCLM tersa ne’e.
Xefe suku Bado-Ho’o Pedro do Rosario esplika, konsellu suku liu husi reuniaun deside aprova ejizensia komunidade hodi konstrui irigasaun eskala ki’ik ho intensaun atu fornese bee ba natar ne’ebé abandona, nune’e komunidade sira bele reativa hikas hodi hasa’e rendimentu produtu lokál liu liu fos.
“Prioridade halo irigasaun ne’e atu aumenta produsaun ekonomia populasaun nian tanba durante ne’e natar ne’ebé atu benifisia ne’e laiha irigasaun agora mak halo konstrusaun,”tenik Pedro.
Orsamentu PNDS alokadu ba suku Bado-Ho’o hodi konstrui irigasaun eskala ki’ik ho montante US 32,047.
Enkuantu, implementasaun atividade PNDS postu administrativu Venilale, suku Baha-Mori konstrui irigasaun eskala kiik atinji 66% no konstrusaun refetoriu atinji 64%, suku Fatulia extensaun estrada cor betaun finaliza 100%, suku Uatu-Haco reabilitasaun estrada rai finaliza 100%, konstrusaun kampu multifunsaun 95%.
Suku Uai-oli reabilitasaun bee-moos sistema gravitasaun atinji 71%, Suku Uai-Laha reabilitasaun bee-moos sistema bomba atinji 100%, suku Uma-Ana-Ulu reabilitasaun estrada rai finaliza 100% no suku Uma-Ana-Iku konstrusaun irigasaun eskala ki’ik atinji 100%.
Ekipa Kobertura : RCLM
The post Implementasaun PNDS Iha Suku Bado-Ho’o Postu Venilale Besik Konklui appeared first on Radio Comunidade Lian Matebean.