RCLM Baucau (16/10/2026) – Sarani Katólika Parókia Santa Terezina Quelicai preokupa ho kondisaun Kapela Sentru Pastorál Ossolia, ne’ebé lokaliza iha aldeia Uaidora, suku Letemumu,tanba kalen kapela sobu husi anin no ai konstrusaun balun komesa dodok.
Sarani Paulo Morreira Soares hateten, Kapela Ossolia nu’udar fatin orasaun ba sarani sira atu hato’o devosaun no hametin sira-nia fiar ba Maromak maibé, kondisaun kapela ne’ebé hetan estragus no ai konstrusaun balun komesa dodok fó risku ba sarani sira iha tempu udan no anin maka’as bainhira hala’o atividade relijioza.
Tanba ne’e nia husu ba Dioseze Baucau hamutuk ho Governu atu konsidera apoiu orsamentu hodi halo reabilitasaun ba kapela ne’e, nune’e sarani sira bele kontinua hala’o atividade relijioza ho seguru.
“Dadaun igreija Ossolia kalen anin sobu tiha,ai sira uluk sarani kontribui kado halo ba Igreja dodok hotu ona balun tara de’it no kalen dodok ona hahú tinan 2022 sa’e mai agora maibé ami kontinua utiliza,misa kordenadór ka Jelador hasai foto lampir ho proposta lori ba parokia kontinua ba Dioseze no hato’o mós ba governu maibe ate agora seidauk iha responde,”hateten sarani sentru pastorál Ossolia.
Iha fatin hanesan,sarani Junita Maria Fernandes,senti preokupa kondisaun sira nia kapela maske partidu CNRT iha tinan 2022 hala’o atividade konsolidasaun eleisaun Prezidensiál no Parlamentár iha Ossolia,promete bainhira ukun sei ajuda hadi’a kapela ne’e maibé to’o agora promesa ne’e seidauk kumpre.
“Ita hare kondisaun kapela at iha tinan 3 tolu liu ba anin sobu no eleisaun prezidensiál no parlamentár partidu CNRT sira mai halo konsolidasaun promete sé Ossolia manan partidu CNRT sira mai hadia kapela maibé realidade sira eleitu tiha sira nia promesa la realiza ne’ebé ami senti triste,” sarani Junita lembra.
Enkuantu, kapela Ossolia sai sentru ba sarani sira husi aldeia Manume, Uaidora no Ruta husi suku Letemumu no komunidade husi vizinus hanesan aldeia Abu-Lir suku Abo hodi hala’o atividade vida espirituál, hanesan misa, katekeze ba labarik sira no atividade relijioza seluk.
Ekipa Kobertura : RCLM
The post Sarani Preokupa Kondisaun Kapela Pastorál Ossolia Quelicai appeared first on Radio Comunidade Lian Matebean.