RCLM Baucau (15/10/2026)—Dapur Programa Merenda eskolar iha Eskola Báziku Filiál Ossolia lokaliza aldeia Uaidora suku Letemumu Postu Administrativu Quelicai Munisipiu Baucau, hetan estragus kauza husi anin boot iha tinan kotuk, seidauk hetan atensaun husi parte kompetente atu hadi’a.
Fornesedora Ekipa Jestaun Programa Merenda eskolar EBF Ossolia Etelvina Bernardinha Belo hateten, kondisaun dapur merenda eskolar hetan estragus, tamba kalen anin sobu seidauk taka, ho kondisaun ne’e kordena eskola tein hahán iha uma, hafoin oferese ba estudante.
“Kondiasaun dapur merenda eskolar ladún di’ak, tamba anin hu sobu tiha kalen balun ita tein iha okos tauk tanba monu ita nia leten, no tauk anin lori ahi han fali ema nia uma hau mak tangujawap, ne’ebé hau ta’uk,” dehan Etelvina iha EBF Ossolia.
Alende ne’e nia informa, implementasaun programa merenda durante ne’e, infrenta problema laiha ai-sunu no bee atu utiliza ba tein, maske matadalan preve item orsamentu atu sosa, maibé la to’o tanba númeru estudante limitadu.
“Ha’u tein uma mak lori mai, tamba ne’e lansar tingal hili ai-sunu de’it, osan kona ba sosa bee no ai-sunu nian loron ida nia la to’o tanba 0,96 cen de’it la to’o 1,00 dólar, tamba ne’e ejije estadu bele tau matan hadi’a dapur dada bee bele tein iha eskola,” fornesedora Etelvina akresenta.
Fatin hanesan Kordenadór EBF Ossolia Francisco Xavier Gusmão hateten, matadalan la autoriza fornesedora prepara merenda eskolar iha uma, maibé tamba kondisaun dapur anin sobu estragus seidauk hetan atensaun husi parte kompetente atu hadi’a maske aprezenta ona ba diresaun.
“Matadalan merenda iha labele tein uma, maibé dapur mak anin sobu tiha ona entaun nia tein iha nia uma, hau hato’o ona kondisaun ne’e ba diresaun liu husi Diretor, GAT no Adjuntu maibé hatan estadu sei tau matan balun, balun seidauk inan aman mak halo,” kordenadór ne’e dehan.
Liga ho Asuntu ne’e Diretór Serbisu Munisipál Edukasaun Munisipál Baucau Afonso dos Santos da Costa konfirma, sei orienta ekipa halo levantamentu dadus hafoin aprezenta ba Ministeriu no Autoridade Munisipál hodi trasa ba planu atu hadi’a.
“Depois ita identifika hato’o ba Munisípiu no nasionál, maibé agora sei sibuk ba ezame nasionál nia observasaun depois hotu ba hare,” informa Diretór Serbisu Munisipál Edukasaun Baucau.
Enkuantu programa merenda eskolar EBF Ossolia estudante hamutuk 48 mak sai benifisiariu, kompostu husi primeiru klase to’o kintu klase.
Ekipa Kobertura : RCLM
The post Dapur Merenda Eskolar EBF Ossolia Quelicai Hetan Estragus Husi Anin appeared first on Radio Comunidade Lian Matebean.