RCLM Baucau (14/10/2026)—Serbisu Munisipál Edukasaun (SME) Baucau, apela ba estudante sira husi pré-eskolár to’o ensinu sekundáriu jerál no tékniku-vokasionál, atu kontinua estuda iha uma durante loron tolu, hahú husi 15 to’o 17 fulan Outubru, tamba suspensaun aula prezensiál kauza husi poluisaun ar ne’ebé kauza husi inséndiu iha Kalimantan no Papua Indonézia, ne’ebé impaktu mós ba Timor-Leste.
Diretór Serbisu Munisipál Edukasaun Baucau Afonso dos da Costa hateten, suspensaun aula prezensiál durante loron tolu ne’e bazeia ba orientasaun husi Ministériu Edukasaun, durante períodu suspensaun ne’e manorin sira fó serbisu iha uma (TPC) ba estudante sira atu kontinua aprende.
“Loron 3 feriadu orientasaun husi Ministériu mai atu labarik sira halimar iha uma no mos profesores sira fó hela serbisu ka traballu de casa, atu labarik sira labele hetan impaktu akontese agora dadauk ne’e,” informa Diretór Serbisu Munisipál Edukasaun ba RCLM iha kna’ar fatin vila Nova kuarta.
Responsavel Másimu Edukasaun Baucau husu mos inan-aman sira atu kontrola no akompaña oan sira durante tempu suspensaun aula prezensiál, hodi asegura sira kontinua estuda iha uma no limita movimentu iha fatin li’ur atu hamenus risku ba saúde tanba poluisaun ar.
“Estudante sira halimar uma inan-aman sira kontrola atu estuda uma laran, labele pasiar tun sa’e tanba nia impaktu la di’ak ba ita nia saúde,” akresenta Afonso.
Aleinde ne’e, Diretór SME Baucau informa, preparasaun ba realizaaaun ezame nasionál no lokál sei hahú iha loron 19 semana oin, SME Baucau hahú organiza preparasaun, inklui fahe responsabilidade ba ekipa sira atu observa sentru realizadór ezame nasionál hamutuk 73.
“Preparasaun ba ezame nasionál ami iha Baucau ohin ami kordena fahe serbisu ba malu, atu ba observa sentru realizador sira oinsá halo komunikasaun serbisu entre diretiva ho diresaun, inklui inspesaun bainhira implementa ezame ida-idak la’o tuir nia serbisu,” relata nia.
Enkuantu, totál estudante husi terseiru siklu nonu anu no klase desimu segundu klase sekundáriu jerál, inklui tékniku-vokasionál, ne’ebé sei partisipa iha ezame nasionál no lokál iha Munisípiu Baucau estudante na’in 5.132.
Ekipa Kobertura : RCLM
The post SME Apela Estudante Iha Baucau Estuda iha Uma Durante Suspensaun Aula Prezensiál appeared first on Radio Comunidade Lian Matebean.