Maumeta, 23 Outubru 2026 – Estudante universitáriu nain 11 husi Instituisaun IOB hahu atividade peskiza kona-ba turismu iha Suku Maumeta, ohin, iha sede suku. Atividade ne’e sei hala’o durante loron tolu, husi 23 to’o 25 Outubru 2026.
Abertura atividade ne’e lidera husi Sekretáriu Administrasaun Suku Maumeta, Laurentino dos Santos, ne’ebé hato’o benvindu ba estudante sira. Nia husu estudante sira atu mantén disiplina no hala’o atividade ho di’ak. “Lideransa suku hamutuk ho membru sira seluk sei foti responsabilidade no fó apoiu ba estudante sira durante peskiza iha suku Maumeta,” nia dehan.
Sekretariu Administrasaun suku Maumeta, Laurentino Dos Santos esplika katak xefe suku la partisipa iha abertura ne’e tanba iha asuntu privadu iha atividade kulturál. Tanba ne’e, xefe suku delega nia atu loke atividade peskiza ne’e.
Programa abertura ne’e apresenta husi estudante IOB, José Brites, nu’udar Mestre Serimónia (MC). Depois MC husi liafuan loke no komprimenta lideransa suku, nia entrega serimónia ba Sekretáriu Administrasaun hodi hato’o liafuan no loke atividade ofisialmente.
Tuir mai, xefe grupu peskiza, Mario Maria B. de Deus, hato’o razaun no objetivu peskiza. Nia hatete, objetivu mak atu identifika no analiza kondisaun turismu iha Suku Maumeta, inklui tipu turismu ne’ebé eziste, no atividade saida deit mak hala’o iha sitiu turístiku sira.
Xefe grupu mós aprezenta estudante peskizadór total 11 pessoas, kompostu husi mane nain 5 no feto nain 6. Durante atividade, estudante sira sei deskansa iha sede suku to’o atividade remata.
Iha fatin abertura, estudante sira entrega tais ba Sekretáriu Administrasaun no Ofisiál Administrasaun Suku Maumeta, nu’udar simbolu respeitu ba kolaborasaun no apoiu ba estudante sira nia pedidu atu hala’o peskiza durante loron tolu ne’e. Atividade abertura taka ho foto hamutuk iha sede suku nia oin.
Hakerek : Ekipa SISD-Maumeta
Editor : Verónica J. Manek, Administrador SISD-Maumeta