Covalima (RCCT), 26 Outubru 2026 — Centru Juventude Covalima (CJC) realiza inkontru ho jestór no voluntáriu sira hodi prepara komemorasaun Loron Masakre Santa Cruz ba dala XXXV, ne’ebé sei hala’o iha 12 Novembru 2026, ho atividade sira iha postu administrativu hitu iha Munisípiu Covalima.
Diretór Ezekutivu CJC, Julio Ferreira, hatete katak inkontru ne’e iha objetivu atu prepara no koordena atividade sira ne’ebé sei hala’o iha kada postu administrativu iha munisípiu ne’e.
“Ohin loron ami halo inkontru ida ho jestór no voluntáriu sira iha ne’e, objetivu ida oinsá mak ita nia preparasaun ba komemora loron 12 Novembru ne’e mak sei realiza iha tinan ida ne’e,” dehan Julio Ferreira.
Nia informa katak atividade sira ne’e hetan apoiu hosi Ministériu Juventude, Desportu, Arte no Kultura (MJDAC), ho orsamentu hamutuk US$ 5.000 resin, ne’ebé sei distribui ba postu administrativu hitu iha Munisípiu Covalima.
“Atividade ida ne’e importante loos no hetan apoiu hosi MJDAC ho total orsamentu US$ 5.000 resin. Ida ne’e sei koloka ba postu hitu iha Munisípiu Covalima no kada postu ida sei hetan US$ 750,” nia esplika.
Julio Ferreira hatutan katak atividade prioridade sira inklui kompetisaun diskursu públiku, semináriu, atividade sosiál, misa no kari ai-funan. Atividade hirak ne’e sei hala’o iha ámbitu komemorasaun Loron Masakre Santa Cruz.
Nia mós informa katak CJC sei hala’o monitorizasaun ba atividade sira iha kada postu administrativu atu asegura katak implementasaun tuir Termu Referénsia (ToR) ne’ebé MJDAC determina ona.
“Iha tinan ida ne’e, hosi Centru Juventude Covalima (CJC) rasik mós sei halo monitorizasaun ba atividade sira ne’ebé mak ohin mensiona, atu nune’e bele haree tuir katak realiza duni ka lae iha kada postu ida-idak, tuir ToR ne’ebé MJDAC fó,” nia afirma.
Kona-ba proposta atividade, Julio Ferreira informa katak to’o agora CJC simu ona proposta hosi Postu Administrativu Fatumea. Prazu atu haruka proposta ba CJC mak hahú hosi 15 to’o 30 Outubru 2026.
“Tuir proposta ne’ebé haruka mai iha Centru Juventude Covalima (CJC), foin mak Postu Administrativu Fatumea haruka ona mai,” nia dehan.
Nia hatutan katak informasaun no ToR kona-ba atividade sira ne’e haruka ona ba pontu fokál MJDAC iha kada postu administrativu, atu fasilita preparasaun no implementasaun.
Iha parte ikus, Julio Ferreira husu ba komisaun organizadora iha kada postu administrativu atu implementa atividade sira ho responsabilidade, tuir ToR ne’ebé MJDAC determina ona. Nia mós enkoraja postu administrativu sira atu kontinua promove atividade no programa seluk ne’ebé sai hosi inisiativa rasik.
Komemorasaun Loron Masakre Santa Cruz, ne’ebé hala’o iha 12 Novembru, mós hanesan momentu atu komemora Loron Juventude Nasionál, hodi hanoin no fó omenajen ba joven sira ne’ebé lakon sira-nia moris iha luta ba independénsia Timor-Leste.
Jornalista: J. Correia
Editór: Paul Mandeu
The post CJC Prepara Komemorasaun Loron Masakre Santa Cruz ba Dala XXXV iha Covalima appeared first on Radio Comunidade Cova Taroman (RCCT).