RCLM Baucau (23/10/2026)—Postu Administrativu Quelicai, Munisípiu Baucau, presiza funsionáriu Serbisu Água no Saneamentu (SAS) atu monitoriza ambiente públiku no fasilidade bee-moos, ne’ebé Governu konstrui liu husi Programa Nasionál Dezenvolvimentu Suku (PNDS).
Administradór Postu Administrativu Quelicai, Paulo Jacinto Moreira hateten, Postu Quelicai seidauk iha funsionáriu SAS ne’ebé destaka atu hala’o servisu, nune’e difikulta prosesu atu estabelese Grupu Maneja Fasilidade (GMF) públiku.
Autoridade Postu ne’e esplika, dadaun ne’e servisu Postu Administrasaun lokál komunitáriu mak provizóriu hala’o monitorizasaun ba fasilidade públiku sira iha postu no suku.
Tamba ne’e, nia rekomenda ba Autoridade Munisipál, liu husi Serbisu Água no Saneamentu, atu rekruta no destaka funsionáriu ba Postu Administrativu Quelicai hodi asegura jestaun no manutensaun fasilidade públiku sira.
“Husu ba Prezidente Autoridade Munisipiu Baucau, tamba ami Postu Quelicai laiha funsionáriu servisu Agua Saneamentu, agora konstrusaun bee moos husi PNDS sira ita atu kria GMF tamba ne’e husu tinan oin bele koloka funsionáriu iha ne’ebá atu halo kordenasaun serbisu liga ho ambiente Agua Saneamentu,” Administradór Quelicai aprezenta rekomendasaun ne’e ba Jornalista sira iha Edifísiu Administrasaun Munisipál Baucau.
Enkuantu tuir estimasaun Administradór Postu Administrativu Quelicai presiza funsionáriu SAS na’in rua atu kobre suku hitu, hanesan Abafala, Baguia, Bualale, Laculiu, Letemumu, Macalaco no Uaitame.
Ekipa Kobertura : RCLM
The post Postu Quelicai Presiza Destaka Funsionáriu SAS appeared first on Radio Comunidade Lian Matebean.