RCLM Baucau (22/10/2026)—Serbisu Bee Timor-Leste Empreza publiku (BTL, E.P.) Munisípiu Baucau, sei prioritiza implementasaun projetu kanalizasaun bee-moos hahú husi área urbana Munisípál, no Postu Administrativu sira, bainhira remata sei kontinua ba komunidade sira iha área rurál, suku no aldeia sira ne’ebé seidauk asesu ba bee-moos.
Responsavel BTL, E.P Munisípiu Baucau, Adriana da Rosa Belo esplika, maske atuál BTL.EP halo kanalizasaun bee-moos sei iha área urbana, maibé kontinua konsidera preokupasaun komunidade sira iha área rurál.
Adriana esplika, bainhira lideransa komunitariu sira aprezenta proposta kona-ba nesesidade kanalizasaun bee-moos, BTL Munisípiu Baucau sei enkamiña tutan ba Diresaun Nasionál atu halo avaliasaun sé nesesariu, hetan aprovasaun hodi bele implementa projetu kanalizasaun bee-moos ba komunidade sira ne’ebé seidauk asesu.
“BTL dadauk ne’e sei konsentra ba urbana Munisípiu no postu sira, bainhira ida ne’e remata sei loke ba suku sira maibe lataka dalan sé sira nia proposta to’o iha ne’e hau sei pasa tutan ba nasionál atu tau atensaun mós ba sira nia proposta,” dehan Responsavel BTL Munisípiu Baucau.
Adriana da Rosa Belo mós husu ba lideransa komunitariu sira, atu enkamiña proposta kanalizasaun bee-mos liu husi Programa Nasionál Dezenvolvimentu Suku (PNDS), Servisu Munisipál Bee, Serbisu Munisipál Agua Saneamentu no Ambiente (SMASA) inklui parseiru dezenvolvimentu sira seluk, hanesan World Vision Timor-Leste, Cruz Vermelha Timor-Leste (CVTL).
Nia konsidera, instituisaun no parseiru hirak iha programa implementasaun projetu kanalizasaun bee-moos iha área rurál.
“Hau fó hanoin di’ak liu propoin proposta ba PNDS, SMASA tamba sira hare ba bee rurál nian, inklui World Vision agora dadaun sira apoiu balun kona-ba serbisu atendementu bee ba área rural sira,” tenik Adriana.
Enkuantu Munisípiu Baucau, BTL, E.P.daudaun ne’e implementa projetu kanalizasaun bee-moos área urbana iha Postu Administrativu Baguia, Laga, Quelicai no Venilale.
Ekipa Kobertura : RCLM
The post BTL Prioritiza Kanaliza Bee-Moos Hahú Husi Área Urbana appeared first on Radio Comunidade Lian Matebean.