RCLM Baucau (21/10/2026)—Nonu governu konstitusional liu husi Ministeriu Administrasaun Estatal husu ba Autoridade Munisipiu lima hanesan Aileu, Manatuto, Lautem, Viqueque no Munisipiu Baucau atu aprezenta planu perioridade ba Governu Australia, liu husi parseiru Programa PARTISIPA atu bele apoio iha tinan 2027 to’o iha tinan 2028, inklui mos preparasaun ba Dezentralizasaun Administrasaun Poder Local.
Diretur Nasional Apoio Administrasaun Suku Celestinho Marques hateten, apoio husi parseiru dezenvolvimentu bele ajuda faselita no hametin prosesu, maibe responsabilidade no nain ba reforma dezentralizasaun nafatin iha governu Timor Leste, no lideransa Municipal sira nian.
Diretur ne’e hatutan, aktividade ne’ebe konkorda ona tenke alina ho perioridade governu no planu asaun annual Munisipal sira nian, hametin sistema governu ne’ebe eziste, dezenvolve kapasidade funsionariu husi nasional no munisipal, promove partisipasaun feto, EhD, juventude no grupo vulneravel sira hodi bele hamosu benifisiu ba komunidade depois apoio programa ne’e remata.
“Ha’u espera katak ho workshop ida ne’e bele produs prioridade ne’ebe klaru, realista, no estratejiku ne’ebe bele informa diskusaun iha nivel nasional no ajuda Ministerio Administrasaun Estatal no programa PARTISIPA, atu prepara planu servisu ida ne’ebe responde realidade Municipal sira nian”. Dehan Diretur Nasional Apoio Administrasaun Suku Celestinho Marques ba jornalista sira iha salaun Munisipal Soimali Quarta, 21/10/2026
Reprezentante Prezidente Autroidade Munisipiu Baucau Eduardo Filipe ximenes hateten, Konsultasaun Planu Servisu PARTISIPA ho Autoridade Munisipál ba tinan oin, ida ne’e la’ós halo atu fo resposta de’it ba dokumentu, maibé presiza fo kontribuisaun konkreta kona-ba atividade, rezultadu, responsabilidade, tempu no rekursu, inklui Planu prioridade ne’ebé trasa tenke tradúz ba asaun ne’ebé responde ba realidade no Munisípiu ida-idak nian.
“Workshop ba loron ohin ita presiza másimiza tempu hodi ativa iha diskusaun no aprezenta prioridade prinsipál saida maka presiza PARTISIPA nia suporta, iha tinan oin no armoniza proposta Munisipál sira ho prioridade nasionál no área prinsipál husi apoiu PARTISIPA nian. Nune’e remata sesaun traballu ita valida ona prioridade no atividade prinsipál ne’ebé halo iha konsultasaun nivel rejionál hodi aprezenta ba Sua Exelénsia Ministru Administrasaun Estatal no mós Embaixada Austrália, bainhira parte rua hetan ona aprovasaun kontinua ba implementasaun iha tinan oin”. Hateten Eduardo
Partisipantes ne’ebe partisipa iha Konsultasaun Planu Servisu PARTISIPA 2027 iha nivel rejionál mak hanesan, prezidente Autoridade Munisipiu, sekretario Munisipal no Diretores lina sektorais ne’ebe mai husi Munisipiu Lima kompostu husi Munisipiu Aileu, Manatuto, Lautem, Viqueque no Munisipiu Baucau.
Ekipa Kobertura : RCLM
The post Governu Husu Autoridade Munisipal 5 Atu Aprezenta Planu Prioridade ba Governu Australia appeared first on Radio Comunidade Lian Matebean.