RCLM Baucau (20/10/2026)—Komunidade iha Suku Bado-Ho’o, Postu Administrativu Venilale, Munisípiu Baucau enfrenta problema falta bee-moos atu responde ba nesesidade loroloron tanba kauza bailoron naruk debit bee menus.
Xefe Suku Bado-Ho’o,Pedro do Rosario,hateten nia komunidade kompostu husi aldeia lima,antes ne’e hetan ona sistema kanalizasaun bee-moos liuhusi Programa Nasionál Dezenvolvimentu Suku (PNDS) iha tinan 2021–2022,maibé bailoron naruk, debit bee husi sistema kanalizasaun komunidade balun tenke la’o distánsia liu kilómetru ida atu kuru bee iha mota, hodi uza ba nesesidade hanesan te’in no haris.
“Bailoron agora naruk bee mak araska ba komunidade aldeia lima hotu tanba debitu menus loron rua tolu foin mai komunidade kuru no dalaruma ba buka iha mota foin kuru ne’e impaktu tebes estudante tanba la’o dok entaun artrazu ba eskola,”dehan Pedro ba RCLM tersa ne’e.
Lideransa komunitária ne’e esplika,atu responde ba nesesidade bázika komunidade nian,Konsellu Suku Bado-Ho’o identifika ona bee-matan Komulale nu’udar fonte bee alternativu nune’e iha tinan oin, Konsellu Suku sei trasa planu liuhusi Programa Nasionál Dezenvolvimentu Suku (PNDS), hodi kanaliza bee-moos no fornese ba komunidade.
“Iha ona planu ita sosializasaun ba komunidade oinsá aumenta bee matan seluk Komulale iha aldeia Caiuatula atu aumenta kanaliza ba ita nia komunidade,”esplika Xefe suku Bado-Ho’o.
Enkuantu,Suku Bado-Ho’o kompostu husi aldeia lima hanesan aldeia Caiuatula,Uai-Cana,Uai-Bobo,Uatu-Bela-Oli no Uma-Ana-Ico ho total Uma Kain 742 no Populasaun 3.182.
Ekipa Kobertura : RCLM
The post Komunidade Suku Bado-Ho’o Postu Venilale Enfrenta Problema Menus Bee-Moos appeared first on Radio Comunidade Lian Matebean.