RCLM Baucau (15/10/2026)—Edifisiu Eskola Báziku Filiál (EBF) primeiru no segundu siklu Ossolia lokaliza iha aldeia Uaidora suku Letemumu Postu Administrativu Quelicai Munisipiu Baucau, didin ho au-betun inklui ai konstrusaun hahu dodok no kalen ferujem.
Kordenadór EBF Ossolia Francisco Xavier Gusmão hateten, edifísiu ida kompostu sala aula tolu kondisaun at, amesa ba estudante no profesores sira nia vida bainhira akontese anin no udan boot.
Kordenadór Eskola afirma kondisaun ne’e aprezenta ona serbisu Munisipál Edukasaun Baucau, maibé seida’uk iha resposta.
Dirijente EBF Ossolia husu ba governu liuliu Ministeriu Edukasaun, atu trasa ba planu iha tinan 2027 bele halo reabilitasaun atu fó seguru vida estudante no profesores, iha prosesu aprendisazem diaria.
“Iha eskola ne’e sala neen maibé sala tolu sorin aat grave liu iha tempu udan ami profesores ho aluno tur lametin tanba kakuluk mos aat ona, didin ladiak hotu, despois udan tama de’it sala laran no ami sente ladiak, ami hato’o ona karta pedidu no Gabinete Apoiu Tékniku (GAT) mai hare ona maibe to’o agora seida’uk resposta,” relata Kordenadór EBF Ossolia.
Estudante EBF Ossolia Arsenia Gusmão Pereira sente preokupa sira nia sala aprendisazem kondisaun aat, maibé seidauk hetan atensaun husi Ministériu Edukasaun atu rehabilita.
“Ami sente triste ami nia sala aula tolu ladi’ak tempu udan, udan ben tama ami tuir aprendisazem la di’ak tamba ne’e husu ba Ministeriu Edukasaun hadi’a ami nia eskola,” dehan estudante.
Hatan ba preokupasaun ne’e, Diretór Serbisu Munisipál Edukasaun Baucau Afonso dos Santos da Costa konfirma, tékniku Serbisu Munisipál halo ona levantamentu eskola sira, ne’ebé kondisaun aat iha Munisípiu Baucau, inklui EBF Ossolia no aprezenta ona Ministériu Edukasaun hodi trasa ba planu rehabilitasaun maibé sei fazeadamente.
“Relasiona ho informasaun infrastrutura eskola iha Baucau ita iha infrastrutura enjineiru sira, destakadu no Munisiapal identifika ona no ita iha dadus enkamina ona ba nasionál no Munisipál, no iha ona planu maibé implementasaun mak sei hare prioridade sei aprova husi Ministériu no hare ba orsamentu,” hateten Diretór Serbisu Munisipál Edukasaun Baucau.
Entretantu EBF Ossolia kompostu primeiru no segundu siklu, maibé eskola ne’e primeiru klase to’o de’it kintu klase tamba iha de’it sala aula lima, enkuantu estudante pasa ba sestu klase tenke ba EBC iha Quelicai vila. Totál estudante anu letivu 2026 hamutuk 48 no manorin na’in tolu inklui kordenadór ida.
Ekipa Kobertura : RCLM
The post EBF Ossolia Quelicai Sala Tolu Didin ho Au-betun Hahú Dodok appeared first on Radio Comunidade Lian Matebean.