RCLM Baucau (13/10/2026)—Governu liu husi Ministériu Obras Públikas (MOP) rehabilita estrada rurál ho distánsia hamutuk 7,250 kilómetru, husi área Lacudala,Suku Laculiu, to’o Waibutai, Aldeia Laumana, Suku Letemumu, Postu Administrativu Quelicai, Munisípiu Baucau.
Enjeñeiru Kompañia Jamicia Unipessoal Limitada no Kompañia Bengram Unipessoal Limitada, Octaviano Mariano dos Santos hateten, projetu dadaun implementa, selebra kontratu ho Ministériu Obras Públikas iha fulan Abríl 2026, no dadaun sira kontinua serbisu to’o agora iha ona faze konstrusaun valeta inklui muro protesaun, bainhira remata kontinua plan konkret tuir dezeñu ne’ebé determina.
Octaviano afirma, parte kompañia kompromete atu asegura kualidade obra no esforsu atu aselera implementasaun projetu, hodi bele remata tuir prazu kontratu ne’ebé determina durante tinan ida.
“Serbisu ami halo ona mak pembersian ka hamos dalan, agora todan mak hada salurang no tembok penahan, maibé ami tarjetu fulan ne’e hotu halo ona plan konkret ka sor ona estrada, durante serbisu problema sosiál la iha, serbisu normál no ami garantia serbisu tinan ida iha data kontratu abril tinan oin hotu ona,” dehan Enjeñeiru Kompañia Jamicia Unipessoal Limitada no Kompañia Bengram Unipessoal Limitada iha aldeia Laumana.
Komunidade Suku Letemumu José Sarmento no Cedilizio dos Santos dehan, sente kontente tebes no agradese ba Governu, tanba konsidera sira nia preokupasaun rehabilita estrada rurál ba sira nia hela fatin, atu fasilita movimentu ho transporte públiku hodi transporta produtu lokál ba merkadu iha Postu Administrativu Quelicai no Munisípiu Baucau.
“Tinan barak dalan ladi’ak ami sente triste, maibé agora tinan 2026 hadi’a ona ami komunidade sira sente kontente tanba kareta sira mai lori ami nia produtu lokál ba merkadu atu fa’an,” komunidade suku Letemumu hateten.
Projetu rehabilitasaun estrada rurál ne’e fahe ba pakote tolu kompostu pakote dahuluk ho distánsia 2,5 km, ho orsamentu US$ 449,738.06, implementa husi kompañia Marijossa DGM Unipessoal Limitada, progresu fiziku atinji 20%.
Pakote daruak distánsia 2,5 km, ho orsamentu US$ 488,982.90, implementa husi Kompañia Bengram Unipessoal Limitada ho JV Rozy Construction Unipessoal Limitada, progresu fiziku atinji 15%.
Pakote datoluk distánsia 2,25 km, ho orsamentu US$ 436,009.74, implementa husi Kompañia Jamicia Unipessoal Limitada progresu fiziku projetu atinji 33,28%.
Enkuantu durasaun implementasaun kontratu ba projetu pakote tolu ne’e tinan ida, hahú implementa iha 27 Abríl 2026 no sei termina iha 27 Abríl 2027.
Ekipa Kobertura : RCLM
The post Governu Rehabilita Estrada Rurál Laculiu-Waibutai Distánsia 7,250 Km appeared first on Radio Comunidade Lian Matebean.