Maumeta, 26 de Agustu 2026 — Ohin loron Quarta-feira, 26 de Agustu 2026, membru Konsellu Suku Maumeta, liuliu Xefe Suku no Xefe Aldeia sira, halo servisu hamutuk ho Diresaun Dezastre Naturais Munisípiu Liquiçá ohin kado nuu hun rua ne’ebé ameasa ba seguransa no saúde komunidade iha Suku Maumeta.
Atividade ne’e realiza bazeia ba pedidu apoiu husi membru Konsellu Suku Maumeta ba Diresaun Dezastre Naturais Munisípiu Liquiçá, hodi asegura ambiente seguru ba komunidade no fasilita atividade atendimentu saúde iha Postu Saúde Maumeta.
Antes halo kadu, Xefe Suku hamutuk ho ofisiál Diresaun Dezastre Naturais hato’o orientasaun ba ofisiál saúde sira ne’ebé hala’o servisu iha Postu Saúde Maumeta atu sai temporariamente ba liur, hodi garante seguransa durante prosesu kadu. Depois de atividade kadu remata, ofisiál saúde sira bele kontinua fali atendimentu no konsultasaun saúde ba komunidade hanesan baibain.
Xefe Suku Maumeta mós hato’o apresiasaun ba Diresaun Dezastre Naturais Munisípiu Liquiçá no parte hotu ne’ebé envolve iha atividade ne’e, tanba servisu hamutuk ne’e importante tebes atu garante seguransa ba komunidade no funsionamentu di’ak Postu Saúde Maumeta.
Postu Saúde Maumeta kompostu husi doutora nain ida (1), enfermeira nain ida (1), parteira nain ida (1) no farmasista nain rua (2), ne’ebé hala’o atendimentu saúde ba komunidade husi Segunda-feira to’o Sexta-feira, iha oras servisu husi dadeer to’o tuku 5:30 lokraik.
Atendimentu saúde ne’ebé hala’o kada loron importante tebes ba komunidade. Tanba ne’e, seguransa no kondisaun ambiente iha Postu Saúde Maumeta tenki garante di’ak, hodi permite profisionál saúde sira kontinua hala’o sira-nia servisu ho seguru no efetivu ba komunidade.
Hakerek : Ekipa SISD-Maumeta
Editor : Verónica J. Manek, Administrador SISD-Maumeta