JPD-ESG. LAT Lospalos – Estudantes husi Eskola Secundária Jerál (ESG) Lere Anan Timur (LAT) Lospalos, partisipa Kampaña Sensibilizasaun Ekonomia Azul no Lansamentu Lenuk-Tasi, Sabadu ne’e ( 24/10/2026 ) iha Ginásiu Lospalos.
Iha abertura , Prezidente Autoridade Munisipál (PAM), Melio de Jesus, hato’o lia-benvindu ba konvidadu sira No. apel aba ba estudante sira para kuidadu ambiente tasi.
“Atu proteje tasi, ita hotu-hotu bele kontribui ho aktividade simples no sustentaveis iha moris lorloron, nune’e husu ba estudante sira para kuidadu ambiente tasi nian, la bele soe foer arbiru, projete animais mariñus liu-liu lenuk-tasi no korál sira.
Sekretáriu Estadu ba Ensino Sekundáriu Jerál no Ensino Sekundáriu Tékniku-Vokasionál, Domingos Lemos Pires, iha nia diskursu esplika katak kampaña sensibilizasaun no lansamentu ne’e importante tebes atu hasa’e estudantes sira nia konsiénsia kona-ba nesesidade atu proteje ambiente tasi nian.
“ Sensibilizasaun no lansamentu ne’e importante tebes atu hasa’e estudante sira-nia koñesimentu no konsiénsia kona-ba importánsia proteje tasi no rekursu maritimu. Atividade ne’e ajuda estudante sira atu komprende katak tasi mak riku-soin naturál ne’ebé presiza konserva, uza ho responsabilidade no mos bele atrai turista sira mai ita-nia rai,” Domingos Lemos Pires hateten.
Iha fatin hanesan, representante estudante ESG. LAT Lospalos, Viony Sequera, agradese bele partisipa aktividade ne’e no hetan koñesimentu konaba oinsa atu proteje ambiente tasi nian.
“Ha’u sente kontente tanba bele partisipa iha atividade ne’e. Koñesimentu ne’ebe ami hetan liuhusi kampaña ida-ne’e, espera ami bele aplika iha moris loroloron, atu nune’e ita-nia tasi nafatin moos no saudavel ba jerasaun futuru,” nia haktuir.
Durante atividade sensibilizasaun ne’e, realiza mós atividade seluk, hanesan dansa kulturál, teatru no poesia, ne’ebé aprezenta husi estudantes sira husi eskola oioin, inklui Ensino Básiku Centru (EBC ), Ensinu Sekundária Jerál (ESG) no Ensinu Eskundária Tékniku Vokasional (ESTV).
Entretantu, aktividade ne’e hetan partisipasaun husi ema hamutuk atus lima (500 ), ne’ebe kompostu husi estudante EBC, ESG no ESTV. Husi total n’e , estudante husi eskola ESG. LAT Lospalos hamutuk lima nulu (50 ).
*
Hakerek textu : Ekipa JPD LAT Lospalos
The post ESTUDANTES ESG LAT LOSPALOS PARTISIPA IHA KAMPAÑA SENSIBILIZASAUN EKONOMIA AZUL NO LANSAMENTU LENUK-TASI appeared first on Eskola Sekundária Jerál Lere Anan Timur Lospalos.