JPD- ESG. LAT Lospalos – Eskola Sekundária Jerál Lere Anan Timur (ESG LAT) Lospalos kontinua hala’o prosesu Ijame Nasionál 2026 ba loron daruak iha Tersa feira ne’e (20/10/2026 ) , ho hakmatek no tuir prosedimentu sira ne’ebe aplika.
Iha ijame loron daruak ne’e, ekipa Sub-Inspeksaun Jerál ba Administrasaun no Finansas hamutuk ho Superintendente Munisipiu Lautém , vizita eskola ESG. LAT Lospalos atu haree no monitoriza diretamente prosesu hala’o ijame iha eskola, hodi asegura katak atividade sira la’o tuir regra no orientasaun ne’ebé estabelese.
Sub-Inspetór Jerál ba Administrasaun no Finansas, Jeremias Gomes, informa katak objetivu husi vizita mak halo inspeksaun jerál ka monitorisazaun konaba prosesu ijame nasional 2026 iha teritória tomak inkuli mos iha eskola ESG. LAT Lospalos.
“ Tuir ami nia observasaun, ijame nasionál ne’ebe realiza loron rua ona ne’e la hasoru problema ne’ebe grave, antes tuku 7.45 estudante no manorin vijilantes iha hotu areadores eskola, estudante sira halo ijame ho seriedade no disiplinadu. Ami observa kondisaun sira no foti informasaun balun para bele rekomenda ba futuru atu hadia falla sira no buat ne’ebe diak ona ita bele melhora liu tan,” katak nia.
Diretór eskola ESG. LAT Lospalos , Olandino da Costa Belo, no mesmo tempo nu’udar responsavel ijame Nasionál 2026, informa katak labele realiza vijilansia kruzada tamba kestaun tempo.
“ Bazeia ba kestaun ne’ebe parte sub-inspetór Jerál hato’o konaba vijililansia kruzada, ami parte eskola labele realiza tamba kestaun tempo. Iha tinan ida ne’e, Manual ijame Nasionál no informasaun ka orientasaun husi Nasionál mai tarde nune’e ami labele halo preparasaun,” tenik diretór eskola.
Sub-IG sujere katak vijilansia kruzada ne’e bele realiza iha periodo tuir mai para evita husi deskonfiadu no garante katak iha transparénsia, disciplina no kredibilidade iha prosesu ijame Nasionál.
Entretantu ijame Nasionál 2026 ba loron daruak ne’e, estudante finalista ESG. LAT Lospalos hamutuk atus rua lima (205 ) presente hotu, enkuanto materia ijame nasionál ba loron daruak hahu ho materia jerál Português no segunda horas materia Quimíca ba programa CT no materia Sosiologia ba programa CSH.
*
Hakerek Textu : JPD LAT Lospalos
The post SUB-INSPETÓR JERÁL BA ADMINISTRASAUN NO FINANSAS VIZITA PROSESU IJAME NASIONÁL 2026 IHA ESG LAT LOSPALOS appeared first on Eskola Sekundária Jerál Lere Anan Timur Lospalos.