JPD-ESG. LAT Lospalos — Eskola Sekundária Jerál Lere Anan Timur (ESG LAT) Lospalos, entrega pontus Ijame Nasionál 2026 ba Sekretariadu Ijame Nasionál iha Diresaun Edukasaun Munisipál Lautém, Kuinta feira ne’e (22/10/2026) , molok haruka ba nasionál atu halo koreksaun no validasaun.
Atividade entrega pontus ne’e hanesan etapa importante atu asegura katak rezultadu avaliasaun ba estudante sira hetan verifikasaun no koreksaun ho di’ak, tuir prosedimentu ne’ebé autoridade edukasaun determina.
Parte sekretariadu ijame nasionál husi Diresaun Edukasaun Munisipál Lautém, Julio Branco da Silva, hateten katak pontus Ijame Nasionál ne’ebe entrega ona sei haruka ba parte kurrikulum nasionál para bele halo koreksaun.
“ Total envelope ijame Nasionál 2026 ne’ebe entrega ba diresaun Edukasaun Munisipál hamutuk atus sia hitu nulu resin sia (979) envelope. Envelope sira neé mai husi nivel edukasaun oioin hanesan Ensino Básico hamutuk 525 envelope, Ensino Rekorrente 6 envelope, Ensino Sekundária Jerál 492 envelope no Ensino Tékniku Vokasionál 56 envelope. Envelope sira ne’e sei haruka ba parte kurrikulum nasionál para bele halo koreksaun no tuir manual ijame Nasionál , prosesu koreksaun sei hahu iha loron 27 Outobru to’o loron 4 Dezembru,” katak nia.
Iha sorin seluk, responsavél ijame Nasionál ESG. LAT Lospalos, Olandino da Costa Belo, informa katak prosesu ijame nasionál durante loron haat ne’e la’o ho diak, la iha problema ruma ne’ebe mosu no estudante finalista tuir hotu ijame to’o remata.
“ Prosesu ijame nasionál 2026 iha ESG. LAT Lospalos la’o ho diak, estudante finalista sira marka prezensa hotu to’o ijame nasionál remata no la iha problema signifikativu ne’ebe bele impede estudante sira atu halo sira nia prova,” Olandino da Costa Belo hateten.
Nia mos hatutan katak pontus ijame Nasional sira ne’e verifika ona husi ekipa verikador sira, depois ne’e pontus ijame sira sei entrega ba Diresaun Edukasaun Munisipál atu kontinua prosesu tuir prosedimentu ne’ebe aplika.
“ Pontus ijame Nasionál sira ne’e hetan verifikasaun ona husi ekipa verifikador sira no ami entrega ba parte Sekretariadu Ijame Nasionál iha Diresaun Edukasaun Munisipál no kontinua haruka ba Nasionál atu halo koreksaun no validasaun,” nia hatutan.
Etretantu iha Ijame Nasionál, total matéria ijame mak estudante sira tenke tuir hamutuk 7, ne’ebé kompostu husi matéria espesífika 4 no matéria jerál 3. Ba programa CT, matéria espesífika sira mak Matemátika, Kímika, Biolojia no Fízika. Enkuantu ba programa CSH, matéria espesífika sira mak Ekonómia no Métodos Quantitativos, Istória, Sosiolojia no Jeografia. Matéria jerál sira ba programa CT no CSH mak Inglés, Portugés no Tetum.
Iha IJame Nasionál 2026, estudante finalista husi Eskola ESG Lere Anan Timur (LAT) Lospalos, hamutuk 205. Eskola prepara envelope Ijame Nasionál hamutuk 77, ne’ebé entrega ba Diresaun Edukasaun Munisipál Lautém atu kontinua haruka ba nasionál hodi halo koreksaun. Husi total envelope 77 ne’e, kompostu husi 49 envelope husi programa CT no envelope 28 husi programa CSH.
*
Hakerek Textu : Ekipa JPD LAT Lospalos
The post PONTUS IJAME NASIONÁL 2026 HUSI ESG. LAT LOSPALOS ENTREGA BA DIRESAUN EDUKASAUN MUNISIPÁL LAUTEM appeared first on Eskola Sekundária Jerál Lere Anan Timur Lospalos.