Dili (RCAL 26 Outubru 2026) – UNICEF hamutuk ho Sekretariadu Estadu Comunikasaun Sosiál (SEComS) Diresaun Geral Comonikasaun Sosial, Diresaun nasional de Dezemvolvimentu Media fó formasaun ba jornalista rádiu komunidade hamutuk na’in tolunulu husi munisípiu hotu, inklui Oekusi no Ataúru.
Formasaun ne’ebé la’o durante loron rua (21-22 Outubru 2026 ) iha Dili ne’e, foka liuliu ba Reportagen klimátika ne’ebe sentraliza ba oinsá kobre impaktu mudansa klimátika ba labarik sira nia moris.
Reprezentante UNICEF iha Timor-Leste, Patrizia Digiovanni, hateten ba partisipante sira katak, média iha papél boot atu transforma siénsia klimátika ne’ebé komplikadu ba informasaun ne’ebé fasil, no bele ajuda komunidade foti desizaun.
Formasaun durante loron rua ne’e, Patrizia husu ba jornalista sira atu la’ós de’it ko’alia kona-ba dezastre, maibé tenke kobre mós kona-ba solusaun, bee moos, aihan, no edukasaun ba labarik sira.
Iha fatin hanesan, Diretór Jerál SEComS, Florindo da Costa, fó agradesementu ba parseria ne’e no husu ba jornalista sira atu kontinua serbisu hamutuk hodi kria ambiente ne’ebé seguru no reziliente ba labarik sira iha Timor-Leste.
Programa ne’e hetan apoiu finanseiru husi Ajénsia Kooperasaun Internasionál Koreia (KOICA).
Reportagen Julmira Cab Colo
The post UNICEF NO SEComS TREINA JORNALISTA RÁDIU KOMUNIDADE KONA-BA MUDANSA KLIMÁTIKA appeared first on radioatonilifau.tl.