RCLM Baucau (26/10/2026)—Projeitu konstrusaun sistema bee-moos husi Waibuitai ba Postu Administrativu Quelicai, Munisípiu Baucau, liu ona data kontratu, maibé to’o agora seidauk finaliza tanba mosu problema sosiál.
Projeitu ne’e fahe ba pakote rua, iha ne’ebé pakote ida responsabiliza husi kompania Nautetu Fatima Unipesoál Limitada, periodu implementasauna fulan neen hahú 04 Abríl 2023 to’o 04 Outubro 2023, maibé to’o agora seida’uk remata.
Enkuantu, kompañia Jatono Unipesoál Limitada, responsabiliza pakote ida periodu implementasaun fulan neen hahú loron 16 fulan Maiu tinan 2023 to’o 16 fulan Novembru 2023, maibé to’o agora seida’uk remata.
Traballadór Manlito Ximenes observa, konstrusaun sistema bee-moos husi Waibuitai ba Postu Administrativu Quelicai kuaze tinan tolu resin ona, maibé servisu balun seidauk hotu.
Nia esplika, servisu ne’ebé implementa ona hanesan instalasaun kanu kanalizasaun,tanki filtrasaun iha bee-matan Waibuitai, tanke distribuisaun no reservatóriu maibe servisu balun seidauk finaliza no projeitu para kuaze tinan ida laiha esplikasaun husi kompañia implementador.
“Durante tinan tolu resin besik tinan haat ona,ami serbisu komesa setembru 2023 too klaran husik tanba saida ne’e ami la hatene problema kompania nian maibé ami serbisu iha ne’e hein deit bainhira mak kompania mai fali atu serbisu tanba komunidade iha ne’e oferese bee abandona de’it,”dehan traballador.
Administradór Postu Administrativu Quelicai Paulo Jacinto Moreira, konfirma projetu konstrusaun sistema bee-moos ne’e paradu tanba problema sosiál entre traballadór balun no kompañia implementadór.
Nia haktuir, Autoridade postu halo ona diálogu ho kompañia no traballadór sira inklui asina ona akordu atu kontinua fali implementasaun projetu to’o tinan ne’e nia rohan hahú fornese kapasidade bee-moos ba komunidade.
“Kompañia Nautetu mak iha problema sosiál entaun seidauk halo konstrusaun tanki ida distribuisaun bee matan mai Quelicai vila tanba iha problema sosiál entre kompañia ho traballador entaun foin dadauk iha loron 16 Outubro bolu kompania rua halo mediasaun iha ona solusaun ne’ebé di’ak kompañia bele selu ona traballador sira ne’e tanba laselu traballador mak halo impdimentu obra ida ne’e maibé kompañia selu ona traballador balun no balun sei iha maibé sira adianta too 31 dezembru kompañia sei responde tuir akordu ne’ebé sita ho traballador, momentu ne’e autoridade mos fó akordu kompañia rua koko bee dentru fulan Novembru iha dezembru bele halo ona kanalizaun ba komunidade ne’ebé presiza,”hateten Administradór Quelicai.
Iha sorin seluk, Kordenadóra BTL, E.P. Munisípiu Baucau, Adriana da Rosa Belo,relata projeitu konstrusaun sistema bee-moos iha Quelica progresu jerál i atinji ona 75%, maibé servisu para tanba problema sosiál maibé, problema ne’e rezolve ona no kompañia sei kontinua fali servisu atu finaliza projetu iha tinan 2026.
Adriana hatutan, kompañia la konsege finaliza no abandona projetu, governu sei la halo pagamentu ba kompañia implementadór.
“Kompañia promete ba komunidade no autoridade sira sei finaliza projetu iha dezembru 2026, BTL mos sei selu kompañia sira serbisu 100%, bainhira to’o dezembru la finaliza BTL sei laselu kompañia tanba ne’e osan povu nian,”dehan Kordenadóra BTL Munisípiu Baucau.
Entretantu Asuntu ne’e Jornalista RCLM la konsege halo konfirmasaun ho responsavel kompañia implementadór tanba okupadu servisu iha nasionál.
Projeitu konstrusaun sistema bee-moos husi Waibuitai ba Postu Administrativu Quelicai,Governu prevee orsamentu dólar amerikanu liu rihun atus hitu.
Sistema bee-moos ne’e sei benefisia komunidade iha suku Lakuliu,Letemumu,Baguia,Macalaco,inklui edifísiu públiku hanesan Administrasaun Postu, Sentru Saúde, eskuadra polísia, igreja no eskola.
Ekipa Kobertura : RCLM
The post Projeitu Konstrusaun Bee-Moos iha Quelicai Liu Ona data Kontratu, Maibé Seidauk Finaliza appeared first on Radio Comunidade Lian Matebean.