JPD – ESG. LAT Lospalos – Eskola Sekundária Jerál Lere Anan Timur (ESG LAT) Lospalos, hala’o atividade preparasaun atu garante katak estudante sira prontu atu hasoru Ijame Nasionál 2026. Atividade hirak-ne’e inklui taka naran iha sala ijame, fahe kartaun ba kandidatu sira no hala’o briefing ba manorin sira molok ijame hahú, ne’ebe realiza iha kuinta feira ne’e (15/10/2026 ).
Diretór eskola ESG. LAT Lospalos, Olandino da Costa Belo, nu’udar responsavel ba ijame nasionál hateten, objetivu husi atividade sira-ne’e mak atu asegura katak estudante no manorin sira prontu atu hala’o Ijame Nasionál 2026 ho di’ak, tuir regra no prosedimentu ne’ebe hakerek iha manual ijame Nasionál no lokal.
“ Atividade ida-ne’e nia objetivu mak atu asegura katak estudante sira ne’ebé tuir Ijame Nasionál hetan informasaun no orientasaun ne’ebé presiza, hodi bele prepara an ho di’ak no kumpre prosedimentu sira ne’ebé aplika durante prosesu ijame. Nune’e prosesu Ijame Nasionál 2026 bele la’o ho orden, disiplinadu no tuir prosedimentu ne’ebé estabelese ona,” tenik nia.
Responsavel ijame Nasionál ne’e akresenta katak pontualidade no asiduidade tuir horariu manual ezame Nasional no lokal ne’ebe estabelese ona garante katak ijame bele la’o ho diak no susesu.
“ Husu ba vijilante , estudante no verifikadores sira, hala’o kna’ar ho responsabilidade no kumpre orientasaun ne’ebe hakerek iha manual ezame nasional kona-ba direitu, dever no limitasoens sira. Fó atensaun ba pontualidade, disciplina, integridade no transparénsia durante prosesu ezame, hodi garante katak estudante hotu-hotu bele tuir ezame iha ambiente ne’ebé seguru, hakmatek no favorável,” nia haktuir.
Iha tempo hanesan, Diretór adjuto eskola ESG. LAT Carlito Gonzaga, informa katak total estudante finalista ne’ebé tuir ijame nasionál 2026 mak hamutuk ema atus rua lima (205), kompostu husi programa Ciências Tecnologias (CT) atus ida rua nulu resin neen (126) no husi programa Ciências Sociais e Humanidades (CSH) hamutuk hitu nulu resin sia (79).
“ Ijame Nasional 2026 realiza iha loron 19 to’o 22 Outobru no kontinua ba ijame Lokal ne’ebe realiza iha loron 23 to’o 26 Outobru. Husi total finalista hamutuk ema nain 205 ne’e sei fahe ba 11 salas . 7 salas ba programa CT no 4 salas ba programa CSH no kada sala sei koloka estudante hamutuk ema rua nulu (20),” nia informa.
Ikus liu kolaborasaun diak entre parte eskola, vizilante sira, parte verifikasaun no estudante sira importante tebes atu asegura kualidade no kredibilidade prosesu avaliasaun nasionál.
*
Hakerek textu : JPD ESG. LAT Lospalos
The post ESG. LAT LOSPALOS HALA’O PREPARASAUN MOLOK IJAME NASIONÁL 2026 appeared first on Eskola Sekundária Jerál Lere Anan Timur Lospalos.