JPD- ESG. LAT Lospalos — Estudante finalista hamutuk 205 husi Eskola Sekundária Jerál Lere Anan Timur (ESG LAT) Lospalos partisipa iha Ijame Nasionál 2026 ba loron dahuluk ne’ebe realiza iha Segunda feira ne’e (19/10/2026 ).
Diretór ESG Lere Anan Timur Lospalos, Olandino da Costa Belo, relata prosesu ezame nasionál iha ESG Lere Anan Timur Lospalos la’o diak no tuir prosedimentu ne’ebe hakerek iha Manual ijame Nasionál no lokal.
“ Ijame nasionál ba tinan ida ne’e la’o ho diak, estudante no manorin sira mai pontual, tuku 7.45 estudante no vijilante sira iha sala ijame laran ona, tama no sai tuir tempo ne’ebe estabelese ona. La iha problema kona ba pontos ijame no estudante la kestiona hanesan tinan kotuk, “ nia relata.
Iha tempo ne’ebé hanesan, Diretór Nasionál Ensino Recorrente, Alfredo de Araujo, hala’o observasaun ba lala’ok ijame nasionál ba loron dahuluk nian.
“ Ami mai atu halo observasaun konaba lala’o ijame nasionál , estudante no vijilante tama no sai tuir oras ne’ebe estabelese ona ka lae, asegura katak materiál Exame Nacional nian iha kondisaun konfidensiál no disponivel ba estudante hotu-hotu ,” tenik Diretór Nasionál.
Diretór Nasionál ba Ensino Rekorrente ne’e mos observa kondisaun eskola hanesan edifisiu , sala informatika no biblioteka ne’ebe la favoravél atu uza no sujere ba eskola atu prepara proposta ida hodi aprezenta ba diresaun para haruka ba Nasionál.
Tuir dadus finalista husi ESG Lere Anan Timur Lospalos hamutuk estudantes nain 205 kompostu husi programa Ciências Tecnologias (CT) hamutuk ema nain 126 no Ciências Sociais e Humanidades (CSH) ema nain 79, ne’ebe presente hotu iha loron dahuluk.
Entretantu materia ba ezame nasionál ba Ensinu Secundáriu Jeral Lere Anan Timur Lospalos hamutuk materia 7 no materia ba ijame lokál hamutuk 5, enkuanto ba ijame loron dahuluk nian materia Matemática ba programa CT no materia Economia e Métodos Quantitativos ba programa CSH depois ba segunda hora mak materia jeral Inglés.
*
Hakerek textu : Ekipa LAT Lospalos
The post ESTUDANTE FINALISTA ESG. LAT LOSPALOS HAMUTUK 205 PARTISIPA IJAME NASIONÁL 2026 appeared first on Eskola Sekundária Jerál Lere Anan Timur Lospalos.