JPD – ESG. LAT Lospalos _ Ministériu Ensinu Superiór, Siénsia no Kultura (MESCC) ne’ebe destakadu iha munisipiu Lautem hala’o sensibilizasaun kona-ba asesu ba Ensinu Superiór Públiku, liuliu Universidade Nasionál Timor Lorosa’e (UNTL) no Instituto Politékniku Timor-Leste (IPTL) ba estudante finalista eskola ESG. Lere Anan Timur Lospalos iha Kuarta feira ne’e ( 07/10/2026 ).
Koordinador Ensinu Superiór Munisipiu Lautem, Marlito do Carmo Santos, hateten objetivu husi aktividade ne’e atu fahe informasaun kona-ba prosedimentu asesu ba UNTL no IPTL.
“Sensibilizasaun ida ne’e importante tebes para estudante sira hetan informasaun klaru kona-ba asesu ba ensinu superiór, liuliu UNTL no IPTL. Ami hakarak estudante sira prepara an ho di’ak no aproveita oportunidade atu kontinua sira-nia estudu,” tenik nia.
Nia akresenta, tinan ida ne’e IPTL aumenta departementu foun mak hanesan Turismo no Hotelaria ne’ebe loke iha Munisípiu Lautém.
“ Tinan ida ne’e IPTL loke departementu foun iha Munisípiu Lautém, ne’ebe destaka iha eskola ESG. Conis Santana Lospalos, departementu ne’e loke ba finalista programa Ciénsia Sociais no Humanidades (CSH) no ba programa Ciéncia no Teknolojia (CT) bele rejistu liu rejime espesial hakbiit,” nia akresenta.
Responsavel maxímu eskola ESG. LAT Lospalos, Olandino da Costa Belo, apresia tebes ho sensibilizasaun konaba prosesu asesu ensinu superior públiku UNTL no IPTL ne’e.
“Ami apresia tebes ba MESCC tanba fó informasaun kona-ba asesu ba UNTL no IPTL ba estudante finalista sira , nune’e sira bele hatene kriteriu oinsa atu bele asesu , bele hili departamentu tuir ida-idak nia abilidade no tuir data inksrisaun ne’ebé determina, ” katak nia.
Sorin seluk, representante estudante finalista ESG. LAT Lospalos, Elias da Costa de Fatima, sente komprende liu konaba prosesu asesu ba ensinu superiór.
“Depois partisipa iha sensibilizasaun ne’e, hau komprende di’ak liután kona-ba prosesu asesu ba ensinu superiór liu-liu ba UNTL no IPTL no ami bele hili departementu tuir ami nia interese bazeia valor final ne’ebe ami hetan ,” dehan nia.
Entretantu, prosesu simu no rejistu estudante foun sira ne’ebe liuhusi rejime espesiál hahú husi loron 26 to’o 30 fulan Outubru tinan 2026 iha resintu Edukasaun Munisipál.
*
Hakerek textu: JPD ESG. LAT Lospalos
The post MESCC SENSIBILIZA KONA-BA ASESU UNTL NO IPTL TINAN AKADEMIKU 2027 BA ESTUDANTE ESG. LAT LOSPALOS appeared first on Eskola Sekundária Jerál Lere Anan Timur Lospalos.