JPD – ESG. LAT Lospalos — Komisaun Nasional ba United Nations Educational, Scientific and Cultural Organization (UNESCO) liu husi Sentru Estudu Siénsia no Matematika (SESIM) realiza survey fatin ba selebrasaun loron mundial Siénsia no Matematika iha Escola Secundária Geral Lere Anan Timur (ESG LAT) Lospalos, Kuarta feira ne’e (30/09/2026 ).
Koordinador SESIM , Zeca Fernandes, hateten objetivu husi aktividade ne’e atu haree no avalia kondisaun no fasilidade eskola ne’ebe apropriadu ba selebrasaun loron mundial Siénsia no Matematika.
“ Ami mai eskola ESG. LAT Lospalos ne’e atu survey fatin ka identifika fatin ne’ebe bele suporta atu selebra loron mundial Siênsia no Matemátika ne’ebe iha tinan ida ne’e halo iha munisipiu Lautem, espesialmente iha postu 2, Lospalos vila no Tutuala. Ami hare liu ba parte infraestrutura hanesan espasu ne’ebe bele akumula ema ho númeru boot, asesu ba transporte, seguransa, fasilidade sira hanesan haris fatin no bee,” dehan koordinadór SESIM.
Zeca Fernandes akresenta katak sei halo koordinasaun ba eskola identifikadu no forma komisaun iha eskola refere.
“ Depois halo identifikasaun , ami ekipa sei halo diskusaun konaba eskola ne’ebe priense kriteria atu sai fatin identifikadu ba eventu selebrasaun, no sei halo koordinasaun ba eskola refere, forma komisaun para bele asegura aktividade ne’e la’o ho diak” nia akresenta.
Iha sorin seluk, Diretór adjunto eskola ESG. LAT Lospalos , Carlito Gonzaga, simu ho diak ekipa no fó informasaun ne’ebé presiza kona-ba kondisaun eskola.
“ Ami parte eskola apoiu wainhira eskola ESG LAT Lospalos sai fatin selebrasaun ba loron Mundial Siénsia no Matemátika ba tinan ida ne’e . Espera atividade ne’e bele atrai interese estudante ba siénsia no matematika, bele hasa’e sira nia kreatividade no inovasaun,” katak Diretór Adjunto.
Aktualmente loron mundial Siénsia no Matematika monu iha loron 10 Novembru, mas tuir kalendariu Ministériu Edukasaun, iha fulan Novembru sei realiza ijame pasagem nune’e loron selebrasaun sei altera ba loron 2 to’o 5 Dezembru.
*
Hakerek Textu : JPD ESG. LAT Lospalos
The post SESIM – UNESCO HALO SURVEY IHA ESG LAT LOSPALOS ATU DETERMINA FATIN SELEBRASAUN LORON MUNDIAL SIÉNSIA N0 MATEMATIKA TINAN 2026 appeared first on Eskola Sekundária Jerál Lere Anan Timur Lospalos.